१४ चैत (२०८१), काठमाडौं । नेकपा (एमाले) विपद् व्यवस्थापन तथा स्वयंसेवा विभागको बैठक महासचिव शंकर पोखरेलको उपस्थितिमा बसी विपद् व्यवस्थापनसम्बन्धमा महत्वपूर्ण छलफल गरी सम्पन्न भएको छ  । 
विभाग प्रमुख तथा पार्टीका पोलिटव्यूरो सदस्य खिमलाल भट्टराईको अध्यक्षतामा पार्टीको केन्द्रीय कार्यालय, च्यासलमा बसेको बैठकमा बाढीपहिरो, आगलागी, भूकम्प, हुरिबतास, चट्याङ लगायत सबैखालका भवितव्यका कारण आइलाग्ने विपद्बाट सुरक्षित रहने तथा कम क्षतिका लागि अपनाउनुपर्ने उपाय र जनचेतनाका बारेमा घनीभूत छलफल भएको थियो ।
बैठकमा महासचिव पोखरेलले विपद्बाट सुरक्षित रहन जनसचेतनामा आधारित कार्यक्रमलाई महत्वका साथ अगाडि बढाउनुपर्ने बताउनुभयो ।
उहाँले मौसमी विपद्का घटना चट्याङ, हुरि बतास, सुख्खा र आगजनीबाट जोगिने सन्देशमूलक प्रतिकार्यात्मक सामग्रीहरू प्रवाह गर्नुपर्नेमा जोड दिनुभयो । 
महासचिव पोखरेलले सरकारको तर्फबाट विपद् व्यवस्थापनका सन्दर्भमा गर्नुपर्ने काम र अपनाउनुपर्ने उपायका बारेमा आगामी नीति कार्यक्रम र बजेटमा समावेश गर्न सकिने गरी विभागलाई विपदसम्बन्धी सुझावहरू तयार गरी पेश गर्ने निर्देशन दिनुभयो । 
उहाँले नेपालमा २०४६ अघि विकासको गति कस्तो थियो, विपदमा उद्धार, राहत सहयोग र पुननिर्माणको कस्तो थियो र त्यसयता कस्तो छ भन्ने विषयमा तथ्यमा आधारित तुलनात्मक अध्ययन गरी प्रतिवेदन तयार गर्न आग्रह गर्नुभयो ।
बैठकबाट विपदसँग सम्बन्धित विज्ञहरूसँग सुझाव लिनुका साथै विपद व्यवस्थापनका सम्बन्धमा विभागको तर्फबाट सरकारलाई दिइने सुझाव तयार गर्न विपदविद अनिल पोखरेलको संयोजकत्वमा तीनसदस्यीय समिति गठन गरिएको छ । समितिमा विपदविद सूर्यनारायण श्रेष्ठ र वसन्त अधिकारी रहनुभएको छ । 
बैठकले भूकम्प पुननिर्माण दिवस(बैशाख १२)को सन्दर्भ पारेर आगामी २०८२ बैशाख ६ गते विपदसम्बन्धी अन्तरक्रिया कार्यक्रम गर्ने निर्णय गरेको विभागका सदस्य राजेन्द्र श्रेष्ठले बताउनुभयो । अन्तरक्रियामा नेकपा (एमाले) सम्बद्ध सबै जनसङ्गठन, पार्टीका उपत्यकाका तीनवटै जिल्ला कमिटी, प्रदेश कमिटी र सम्पर्क समन्वय कमिटीहरूलाई सहभागी गराई भएको छ ।