२० चैत (२०८१), इटहरी । नेकपा (एमाले)का महासचिव शंकर पोखरेलले चैत १५ गते काठमाडौंमा भएको अराजकता, लुटपाट र हिंसात्मक घटनाको  मुख्य योजनाकार पूर्व  राजा ज्ञानेन्द्र शाह रहेको बताउनुभएको छ । 
सङ्घीय लोकतान्त्रिक गणतन्त्रको रक्षाका पक्षमा सुनसरीको इटहरीमा नेकपा (एमाले) सुनसरीले आज आयोजना गरेको वृहत जनजागरण सभालाई सम्बोधन गर्नुहुँदै महासचिव पोखरेलले चैत १५ गते भएको अराजकताको सम्पूर्ण जिम्मेवारी पूर्वराजाले लिनुपर्ने बताउनुभयो । 
बङ्गलादेशमा जस्तै लुटपाट मच्चाउँदै व्यवस्था उल्टाउन सकिन्छ भनेर पूर्वराजाले सो वितण्डा मच्चाउन लगाएको उहाँको भनाइ छ । 
पूर्वराजा ज्ञानेन्द्र शाहले गत फागुन ७ गते भिडियो सन्देशमार्फत सार्वजनिक गरेको अभिव्यक्ति ऐतिहासिक संविधान सभाको पहिलो बैठकबाट भएको फैसला बिपरीत रहेको महासचिव पोखरेलले बताउनुभयो । 
गणतन्त्रको स्थापनापछि पूर्वराजा ज्ञानेन्द्र शाहले शान्तिपूर्ण रूपमा नेपालमै बस्न पाउँ भन्ने माग गर्नुभएको स्मरण गराउँदै महासचिव पोखरेलले वर्तमान व्यवस्था, संविधान र जनताको आन्दोलन र आकाङ्क्षा बिपरीतको अभिव्यक्ति स्वीकार नहुने बताउनुभयो ।   
पूर्वराजा ज्ञानेन्द्रकै व्यवहारका कारण नेपालमा राजतन्त्रको अन्त्य र गणतन्त्र स्थापना भएको बताउँदै उहाँले नेपालमा सडकबाट मात्र नभई संविधान सभाले सर्वसम्मतिबाट राजतन्त्रको अन्त्य गरी मुलुकलाई गणतन्त्रमा लगेको स्पष्ट पार्नुभयो । 
अब कसैले संविधानमाथि चुनौती दिन चाहन्छ भने जनताको बीचमा गएर दुईतिहाई बहुमत ल्याई संविधान परिवर्तन गर्न चुनौती दिँदै महासचिव पोखरेलले अरू कुनै पनि उपायबाट संविधान परिवर्तन गर्न नसकिने स्पष्ट पार्नुभयो । 
गणतन्त्र आएपछि केही भएन भन्नेलाई राजाको पालामा भएका विकास र गणतन्त्रमा भएको विकासका कामलाई तुलना गरेर हेर्न उहाँले आग्रह गर्नुभयो । सडक, शिक्षा, स्वास्थ्य, खानेपानी, पूर्वाधार, विद्युत, सञ्चार, प्रविधि, आर्थिक, सामाजिक विकास सबैलाई तुलना गरेर हेर्न महासचिव पोखरेलको आग्रह छ । 
गणतन्त्रको रक्षाका लागि गणतन्त्रका पक्षधर हरेकले तुलनात्मक तथ्यका बारेमा बोल्नुपर्ने, जनतालाई बुझाउनुपर्नेमा उहाँले जोड दिनुभयो । 
महासचिव पोखरेलले लोकतन्त्रको विकल्प लोकतन्त्र नै हुने बताउँदै लोकतन्त्रको विकल्प निरङ्कुश राजतन्त्र हुन नसक्ने स्पष्ट पार्नुभयो ।
कार्यक्रमलाई पार्टीका स्थायी कमिटी सदस्य तथा कोशी प्रदेश ईन्चार्ज शेरधन राई, स्थायी कमिटी सदस्य तथा सांसद भीम आचार्य, सुनसरी ईन्चार्ज जगदीश कुशियत, केन्द्रीय सदस्य भगवती चौधरी, कोशी प्रदेशका आन्तरिक मामिला तथा कानुन मन्त्री रेवती रमण भण्डारी, नेकपा (एमाले) कोशी प्रदेश अध्यक्ष घनश्याम खतिवडा लगायतले सम्बोधन गर्नुभएको थियो ।