१८ चैत (२०८१), काठमाडौं । सङ्घीय लोकतान्त्रिक गणतन्त्रको रक्षाका पक्षमा नेकपा (एमाले)ले आज देशभर जनसचेतना सभा आयोजना गर्यो । 
सात प्रदेशका सात प्रमुख शहरमा वृहत मोटरसाइकल र्याली आयोजना गरियो भने अन्य सबै जिल्लामा सचेतना सभा गरियो । 
पूर्व राजावादीहरूका हर्कतविरूद्धमा गरिएका देशव्यापी कार्यक्रममा हजारौंको सङ्ख्यामा अत्यन्त उत्साहका साथ जनसहभागिता रह्यो । 
काठमाडौं उपत्यकामा मोटरसाइकल र्याली आयोजना गरियो । काठमाडौैंको तीनकुनेदेखि भक्तपुरको सल्लाघारीसम्म गरिएको मोटरसाइकल र्यालीमा हजारौंको सहभागिता रह्यो ।
तीनकुनेमा र्याली शुभारम्भ गर्दै महासचिव शंकर पोखरेलले गणतन्त्रको रक्षाका लागि नागरिक तत्पर रहेको र पूर्वराजा ज्ञानेन्द्र शाह जनताद्वारा सम्मानका साथ राखिएको स्थानमा नबसे सबै कुरा गुमाउनुपर्ने चेतावनी दिनुभयो ।
सङ्घीय लोकतान्त्रिक गणतन्त्र सरकार वा कुनै दलको मात्र सरोकारको विषय नभई जनताको बलिदानीपूर्ण सङ्घर्षको उपलब्धि पनि भएकाले त्यसको रक्षाको लागि सबै जुट्नुपर्ने महासचिव पोखरेलले बताउनुभयो ।
तीनकुनेबाट मोटरसाइकल र्याली शुरु गर्दा पार्टीका नेताहरू स्थायी कमिटी सदस्यहरू भानुभक्त ढकाल, डा. राजन भट्टराई, केन्द्रीय सदस्यहरू लगायत सहभागी हुनुहुन्थ्यो ।