युवा संघ नेपालको स्वयंसेवक भेला 
सङ्घीय लोकतान्त्रिक गणतन्त्रको पक्षमा चैत १८ गते काठमाडौं उपत्यकामा विशाल मोटरसाइकल र्याली हुने 

१३ चैत ( २०८१), काठमाडौं । नेकपा (एमाले)का महासचिव शंकर पोखरेलले माओवादीले तत्कालीन राजा र भारतीयको संरक्षणमा सशस्त्र द्वन्द्व सञ्चालन गरेको बताउनुभएको छ । 
बुधबार राष्ट्रिय युवा संघ नेपालको स्वयंसेवक भेलालाई काठमाडौंमा सम्बोधन गर्दै महासचिव पोखरेलले माओवादीका नेताले आफूले जतिसुकै बलिदानपूर्ण सङ्घर्ष गरेर गणतन्त्र ल्यायौँ भने पनि उनीहरूको वास्तविकता केही समय यताको घटनाक्रम र अभिव्यक्तिले पुष्टि गरेको बताउनुभयो । महासचिव पोखरेलले भन्नुभयो– उनीहरूलाई संरक्षण गर्ने, प्रोत्साहन गर्ने को थिए ? भन्ने कुरा उनीहरूलाई सशस्त्र द्वन्द्वको समयमा जस–जसले सहयोग दिए, उनीहरूले नै बाहिर ल्याइरहेका छन् । 
नेपाली समाजमा हिंसात्मक कार्यलाई शान्ति प्रक्रियामा रूपान्तरण गर्ने काम नेकपा (एमाले)ले नै गरेको उहाँले बताउनुभयो । महासचिव पोखरेलले भन्नुभयो– झण्डै पौन पाँच सय कार्यकर्ता गुमाउँदा पनि हामीले विचलित नभई हिंसालाई शान्तिमा परिणत गर्ने कुराको अगुवाइ गर्यौँ, १२ बुँदे सहमतिका माध्यमबाट माओवादी केन्द्रलाई शान्ति प्रक्रियामा सामेल गर्ने काम गर्यौँ । 
एकै समयमा शान्तिपूर्ण आन्दोलन र हिंसात्मक आन्दोलन सफल नहुने बताउँदै उहाँले माओवादीहरू हिंसात्मक आन्दोलन छाड्न तयार भएपछि मात्र २०६२ सालको जनआन्दोलन सफल भएको उहाँको भनाइ छ । त्यसको अगुवाइ नेकपा (एमाले)ले गरेको उहाँको स्मरण गराउनुभयो । 
शान्ति प्रक्रिया पछि माओवादीको अराजकता नियन्त्रण नेकपा (एमाले)को राष्ट्रिय युवा संघ नेपाल र युथफोर्सले गरेको महासचिव पोखरेलले सुनाउनुभयो । एक समय माओवादीले सहरी विद्रोहबाट सत्ता कब्जा गर्ने सपना देखेको बताउँदै उहाँले अहिले राजावादीहरू त्यही बाटो हिँडेका बताउनुभयो । माओवादीलाई जस्तै राजावादीलाई पनि वैधानिक बाटोमा आउन बाध्य पार्नु पर्ने र त्यसको लागि फेरि एक पटक युवाहरू जुर्मुराएर उठ्नुपर्ने महासचिव पोखरेलको धारणा छ । 
कतिपय मानिसहरूले नेपालको अवस्था पञ्चायतको बेलामा अति राम्रो थियो भन्ने भ्रम फिँजाउने प्रयास गरिरहेका तर यस्तो भ्रमको खेती गरेर राजतन्त्रको पक्षमा जनमत बनाउन सकिन्छ भन्ने सपना नदेख्न उहाँले आग्रह गर्नुभयो । राजतन्त्रको बेलामा भन्दा गणतन्त्र आएपछि नेपाली समाजमा आर्थिक, सामाजिक र सांस्कृतिक क्षेत्रमा उल्लेख्य प्रगति भएको तथ्याङ्क महासचिव पोखरेलले प्रस्तुत गर्नुभयो । 
देश कसरी बनाउने भन्ने विषयमा अब नयाँ सिराबाट छलफल गर्नुपर्ने बताउँदै एमाले सरकारमा रहेको समयमा देशको विकास नयाँ ढङ्गले अघि बढेको उहाँले प्रष्ट पार्नुभयो । देशमा सामाजिक अराजकता, दक्षिणपन्थी अराजकतालाई पनि पराजित गर्न आवश्यक रहेको बताउँदै महासचिव पोखरेलले अब त्यस दिशामा अघि बढ्नुपर्ने स्पष्ट पार्नुभयो । 
राजावादीले मोटरसाइकलमा आफ्नो शक्ति प्रदर्शन गरेको प्रसङ्ग जोड्दै उहाँले मोटरसाइकल र्याली कस्तो हुन्छ भन्ने हेर्न मन भए नेकपा (एमाले)ले चैत १८ गते काठमाडौंमा आयोजना गर्ने र्याली हेर्न आउन राजावादीलाई आग्रह गर्नुभयो ।